Një krim i përbindshëm në Kosovë... - nga Kolec Traboini

6 mësues turq në Prishtinë, pa asnjë argument e akuzë, arrestohen dhe dërgohen në qelitë e Erdoganit në Turqi.

NJË KRIM I PËRBINDSHËM NË KOSOVË 

- 6 mësues turq i bëhen kurban xhelatit Erdogan nga injorantët që na qeverisin.

Nga KOLEC TRABOINI

Nuk është gabim siç shkruan gazeta shqiptaro-amerikane "Illyria" në New York, duke dashur ta zbusë efektin e këtij masakrimi të hapur të qytetareve të lirë turq që nuk kanë mbi supe asnjë krim, kane bindjet e tyre dhe lirinë për tu shprehur se çfarë është më mirë për atdheun e tyre në Turqi, e cila ka në krye një kriminel jashtë çdo kontrolli. Dorëzimi i tyre tek falangat e Erdoganit është krim. Krim i përbindshëm. Dhe krimet janë të dënueshme.

Sepse ata 6 mësues do tu rrezikohet jeta dhe do të torturohen për vdekje nga diktatori i përgjakshëm Erdogan, i cili dihet botërisht se është mik i Thaçit, Hajradinajt e kompanisë së tyre duke përfshi këtu edhe qeveritarët mediokër të Tiranës, që edhe ata i lëpihen si zagarë qeverisë së diktatorit të Ankarasë. Dhe krijimi i mikro-konfliktit kinse Erdogan krimineli  është kundër kryetarit të Qeverisë së Kosovës, është një sajesë groteske që ashtu si Ponc Pilati, qeveria e Kosovës të lajë duart, që tashmë i janë përlyer me gjakun e profesorëve turq që i lëshuan duart e xhelatëve. Akoma me tej për tu shprehur me popullorçe, shkarkimi i ministrit të brendshëm dhe atij të shërbimit të fshehtë të Kosovës, nuk është gjë tjetër veç se në Prishtinë pasi e bënë krimin po duan te lajnë mut me shurrë. Jo duhet te jap dorëheqjen kryeministri si i padenje te drejtoje një vend si Kosova në principet e humanizmit njerëzor. Bashkëpunimi dhe  ndihma që i jepet një diktatori për të torturuar e vrarë njerëz do të nxirrte jashtë loje çdo lloj qeverie apo qeveritari  qe ka sado pak dinjitet. Po këta tanët nuk i njohin principet e humanizmit se janë me mendje në mesjetë e mbase ende në kohën e sundimit e gjenocidit osman në trojet shqiptare.

O mjeranë që jeni në pushtet pa e ditur si e pse është pushteti dhe qeverisja.

O të pa gdhendur që nuk dini çfarë është politike dhe shteti, populli dhe kombi, humanizmi njerëzor kryekreje, mos u sillni si pashallarë në kohëra moderne. Keni nivel intelektual të mjerueshëm dhe injorancë të dukshëm deri në sharlatanizëm.

E hëngrën turpin me bukë. Dhe thonë i kemi shpëtuar hebrenjtë. Ja e vërteta e tyre. Dorëzojnë mësuesit tek xhelati. Turp e faqja e zezë!

Nuk mund të jetë njeri i mirë ai që i çon njerëzit në thertore, përkundrazi e ka shpirtin katran, dhe kushdo që i mbron këto veprime barbare duhet te shohë e te shqetësohet shumëçka ne shpirtin e vet. Asgjë nuk na bashkon me kriminelët dhe bashkëpunëtoret e tyre. Duhet te mbetemi human dhe me ndjejë dhembje për çdo njeri që bie në kthetrat e xhelatëve të pushteteve si Erdogani, Putini apo djalli dhe i biri, dhe këto viktima qofshin shqiptarë apo turq, italianë apo bullgarë se në këtë rast humanizmi njerëzor nuk ka të bëjë me nacionalitete por me të drejtën universale të jetës.

Mallkuar qoftë kushdo që shkatërron jetët njerëzore!

 31 mars 2018

Gozhda e ndryshkur e kulturës - nga Kolec Traboini

GOZHDA E NDRYSHKUR E KULTURËS

Shkruar nga KOLEC TRABOINI

E kemi thënë dhe vazhdojmë ta themi edhe në këtë shkrim të rinovuar: Mirela Kumbaro i ka ngecur në derë si gozhdë e ndryshkur kulturës shqiptare. Një gozhdë që shkul gozhdë. Ca i thonë pykë në diell. Sepse si një talibane e vërtetë shkuli në mënyrë aventurore pllakën përkujtimore të Kinostudios dhe vuri veton duke refuzuar botimin e Antologjisë për Jetimët, refuzoi gjithashtu mbështetjen për botimin e librit “Aristidh Kola” në 70 vjetorin e lindjes së martirit arvanit në korrik 2014, ndërkohë që jepte para pa hesap për fantazmagori si "Tulla TV Online" apo për kompanitë private, pa harruar televizionin satelit të qeverisë, Top Channel, apo mikeshave të veta dhe pse jo, shtëpisë botuese të një deputetit socialist.

Ashtu si atëherë kur u hartua ky shkrim dhe u botua në gazeta “Sot” më 18 shkurt 2015, edhe në vitin 2018 bordi i marrok-teveqelëve të kulturës së Mirela Kumbaros (sipas udhëzimeve të saj mesa duket)  refuzuan mbështetjen e Antologjisë së Fëmijëve Jetimë Shqiptarë sipas kërkesës së përsëritur nga Instituti Kombëtar i Integrimit të Jetimëve Shqiptarë. Ndërkohë që sajesa “Tulla TV” e miqve të ministres merr para sërish e vit pas viti. Ndaj po e përsërisim këtë shkrim sepse problemet janë po ato, dhe protagonistët vazhdojnë të jenë stoike në qëndresën e tyre për t’ia nxjerrë fundin thesit të parave të shtetit gjer në qindarkën e fundit. Dhe kanë të drejtë sa kohë që Ministria e Kulturës është bërë si çifligu i bejlereshës Kumbaro. Në vazhdim  keni shkrimin e  tre viteve më parë, botuar ne shtypin e Tiranës dhe ku vihet re se asgjë nuk ka ndryshuar në prapësi marrëzitë e agallarëve të kulturës.

Mos vallë është i nxituar ky cilësim që i bëjmë ministres së Kulturës Mirela Kumbaro? Nuk besoj. Të gjithë e dinë se me të ardhur në pushtet talibanët hodhën në erë me dinamit skulpturat monumentale budiste mijëravjeçare të gdhendura në shkëmb, duke sfiduar kështu kulturën e mbarë njerëzimit. Po çka të ngjashëm mes ministres sonë të Kulturës, Mirela Kumbaro dhe talibanëve të Afganistanit, mund të pyes me të drejtë lexuesi që nuk e di çfarë bëhet në çifligun personal të kulturës së Mirela Kumbaros. Të paktën në një akt ajo është treguar talibane e vërtetë. Pasi e pushtoi ndërtesën e Kinostudios duke e bërë rezidencë të vetën, kjo ministre shkuli brutalisht pllakën përkujtimore që shënonte datën e inagurimit të Kinostudios, duke zhdukur kësisoj çdo gjurmë të kinematografisë shqiptare që ka qenë vërtet krenaria e çdo shqiptari. Tani kjo ndërtesë e hijshme e madhështore mund të konsiderohet thjesht si rezidenca e Mirela Kumbaros.

Edhe shpenzimet prej qindra mijëra euro për ndërtimin e muzeut të kinematografisë shkuan për dhjamë qeni. Po se mos i nxori nga xhepi i vet ato para zonja ministre? Nga ana tjetër ajo mbase mendon se është harruar fakti se me të ardhur në postin e ministres në koordinim me një deputet socialist bënë shitjen e një pjese të truallit të Kinostudios për të cilën nuk qe i një mendje, madje kundërshtoi  drejtori i Alba Filmit që nuk pranoi të firmoste dhe për këtë refuzim e shkarkuan.  Këtë akt të tjetërsimit të pronës së popullit tek një media private në duart e politikës, ne si kineastë e konsiderojmë një akt vandal. Kështu një pjesë e oborrit të Kinostudios iu kalua televizionit Ora News në mënyrë të fshehtë dhe nuk është vështirë të kuptohet se e gjithë kjo u bë që ky televizion të ishte konformist me qeverinë e të lidhej pas qerres së saj. Dhe shenjat po duken. Në këtë rast kjo ministre është treguar një talibane e vërtetë për t’ia pasur zili edhe në Kandahar.  Por nuk është vetëm kjo. Kjo ministre është një shpërdoruese e vlerave monetare, një njeri që i përdor paratë e popullit për të darovitur të afërm (vëllai i ministres mori dhjetëra miliona lekë për një shfaqje teatri), po kështu marrin të preferuarit personalë apo edhe institucionet e medias të cilat i miklon për të qenë manarë të Qeverisë, që askush të mos gjejë një shteg në media për të pasur një zë kundërshtues për veprimet arbitrare të ministres tonë të kulturës.

Ministria e Kulturës edhe më parë, por edhe tani është një sektor ku fondet shtetërore për zhvillimin e kulturës kombëtare manipulohen në mënyrën më absurde e më spekulative. Ky institucion nuk mbështet shkrimtarët të cilëve u ka marrë edhe ndërtesën e Lidhjes së Shkrimtarëve dhe Artistëve, në vend të tyre honxhobonxhot e kulturës kanë zgjedhur një mënyrë origjinale, ta zëmë duke mbështetur programe të tilla si djathi kaçkavall. Se çfarë lidhje kanë djathi kaçkavall me kulturën shqiptare, këtë vetëm ata ministrisë së kulturës mund ta dinë. Po këtu dëgjon edhe mrekulli të kësaj natyre; mbështesin një program për historikun e muzikës rok në Shqipëri. A thua se muzika rrok qenka një produkt kulturor autokton shqiptar dhe lënë në mjerim shtëpinë e Luigj Gurakuqit, Gjergj Fishtës dhe asaj të Migjenit që nuk i gjendet as nami e as nishani.

Po le të shkojmë më tej. Këto ditë u njoftuan projektet e përzgjedhura për mbështetje financiare në Art & Kulturë nga kjo ministri. Dhe çfarë nuk gjen në këtë përzgjedhje. “Letërsi/televizion” shkruhet emri i një fituesi për mbështetje nga ministria. Po se çfarë është ky program askush nuk e di. Gjen aty mbështetje për shtëpinë botuese familjare të deputetit socialist “Toena”, që në fund të fundit botimin e kanë biznes fitimprurës dhe është absurde të financohen bizneset në programin e kulturës. Shtëpitë botuese u marrin para për botim shkrimtarëve që janë katandisur në pikë të hallit dhe kjo e ministri e quajtur e kulturës në vend t’u japë shkrimtarëve mbështetje për botimet e veprave të tyre, u jep mbështetje financiare botuesve për t’ua shumfishuar fitimet. Veç një mendje e çartur mund ta bëjë këtë. Gjen aty mbështetje për programe televizive, krejt e kuptueshme kjo me qëllim të miklimit dhe kthimin e tyre në aleatë qeverisës, po gjen aty edhe për festivalin “Jaz” meqë më parë kanë financuar për rrokun amerikan. Po ka mbështetje financiare për enigma si “Tullat Tv,  media kulturore Online”,  kur kësisoj mediash online bëhen me qindra e mijëra pa asnjë shpenzim, sepse bloget elektronike janë falas. Por atyre u  duhet sebepi për të rrjepur arkën e shtetit dhe sebepet i gjejnë  pa shumë mundim.

Rrofsh moj zonja ministre me këto programet e tua. Po e ndrin me kandil e me bishtuk kulturën shqiptare, por edhe qokat i ke në qendër të vëmendjes. Por një gjë duhet të na e shpjegosh mirë,  të bësh transparencë e të japësh pse jo dhe llogari. Si është e mundur që ndërkohë që i jep para Mapos apo edhe Top Chanel-it që është televizioni servil i qeverisë, apo më tej shtëpisë botuese “Saras" filiz i Top Chanel,  në mënyrë arbitrare refuzuat mbështetjen e   botimit të një antologjie për jetimët të propozuar nga Instituti Kombëtar i Integrimit të Jetimëve Shqiptarë. Bordi i specialistëve prej 7 anëtarësh të Ministrisë së Kulturës ishin të gjithë pro dhe asnjë kundër duke miratuar njëzëri projektin e antologjisë për jetimët, ishit ju dhe vetëm ju që vendoset veton dhe me një të fshirë lapsi e rrëzuat këtë botim të veçantë, i pari i këtij lloji në Shqipëri.

E rëndë, shumë e rëndë kjo zonja ministre, në radhë të parë për një grua, një nënë, dhe pastaj një përfaqësuese e qeverisë që trumbeton përmes medias dimensionin social për shtresat në nevojë si forcë e majtë, që mesa duket është një demagogji e gjallë e asgjë tjetër. Ne nuk duam të besojmë se keni ndonjë urrejtje patologjike për jetimët, por duhet të besojmë variantin që ju lehtëson në një farë mënyre, që jeni treguar mendjelehtë edhe për shkak të një fryme kozmopolite në dukje që manifestoni, e që ju bën të anashkaloni kulturën e kombit tënd, shkrimtarët e vendit tënd, fëmijët jetimë të vendit tënd. Si është e mundur që e ndalon atë projekt vetëm pak kohë para se të botohej në faqen zyrtare të ministrisë tuaj. Ju as që sollët ndonjë argument kur e fshitë nga lista. Ishte menduar të realizohej një libër antologji në të cilin të përfshiheshin autorë jetimë, por edhe shkrimtarë të shquar që kanë shkruar për jetimët e ky libër t’u bëhej dhuratë fëmijëve të kësaj kategorie me mesazhin se ju mund të ecni në jetë nën shembullin e këtyre shkrimtarëve që kanë pasur fatin tuaj, por me guxim kanë çarë në jetë dhe i kanë plotësuar ëndërrimet e veta.

Por ju zonja ministre e kulturës, e mohuat këtë mundësi me arrogancën që ju karakterizon dhe me praktikat absurde që ndiqni duke përkrahur vetëm ata që ju pëlqejnë ju personalisht apo me të cilët keni taraf apo miqësi. Ju ua mohuat fëmijëve atë libër, që do t’u jepej falas, i cili do të ishte një mesazh e stimul moral për t’i nxitur që edhe ata, jetimët, të guxonin të futeshin në udhën e artit dhe jemi të bindur që as ju ka vrarë ndërgjegjja fare. Sepse një njeri si ju që i keni ngecur në derë kulturës, nuk mund të ketë ndërgjegje të vrarë, ndaj gjëja më e mirë që mund të bëhej do të ishte që kryeministri i vendit t’ju largonte nga ajo detyrë  një orë e më parë, që kultura shqiptare të mos nëpërkëmbet edhe më tej. Aq më tepër zonja ministre, që manifestoni një sjellje si talibane e kulturës, duhet ta dini se njeriu edhe mund të lindë i shëmtuar, por kjo nuk është asgjë përpara asaj sesi me sjellje e shëmton vetveten njeriu. Mos kini më guxim, zonja ministre  e pseudo kulturës, t’i shihni në sy kineastët që ua shkatërrove krenarinë e tyre, aq më tepër jetimët e Shqipërisë, sepse ju me aktin tuaj shprehët një qëndrim shpërfillës, injorues dhe përbuzës dhe nuk do ta gëzoni respektin e tyre kurrë më.

Edhe mbas tre vjetësh vazhdojmë të konstatojnë se kësisoj gozhdësh të ndryshkura kumbarçe veç kulturë nuk dinë të bëjnë. 

2015 - 2018

Butikë super të shtrenjtë në një vend super të varfër- nga K.Traboini

BUTIKË SUPER TË SHTRENJTË NË NJË VEND SUPER TË VARFËR?!

Nga KOLEC TRABOINI

Në rrugën "Myslym Shyri", pyeta në një dyqan pa asnjë blerës brenda veç dy vajzave të bukura, shitëse a pronare nuk e mora vesh, pyeta pra sa është ajo xhaketinë pranverore në vitrinë. Të dyja një zëri më thanë:

" Është markë, është Angelo Nardelli dhe kushton 500 Euro".

"Nuk kemi ulje", u nguten të më njoftojnë që të mos tentoja të nisja atë dialogun klasik blerës-shitës, e ku shpresohet të gjendet një zgjidhje për të mbetur të kënaqur dy palët. Ky është shpirti i tregtisë, mbajtja e kontakteve e krijimit të iluzioneve se je i fituar duke boshatisur xhepin e kuleten. Aq më tepër e bënte të mundur dialogun blerës-shitës se dyqanet e rrobave kanë nisur të mbyllën e të hapën pranë e pranë, apo siç thuhet në zhargon popullor b/b, dyqane të shumta celularësh. Pesë të tille në hyrje të rrugës "Myslym Shyri" ku dyqane - furra buke janë veç dy.

Në fakt nuk kisha ndërmend të bleja Nardellin e as Tardelin, por xhaketinën, që ishte prej doku blu (me perzierje poliester) pa astar si ato që mbanin kinezët në vitet 1970, me xhepa të mëdhenj dhe me spaleta. Më pelqeu si prerje dhe qepje.

Pra afro 650 dollarë në kursin e ditës në këmbim valutor se dollari kish marrë të tatpjetën atë ditë e Euro ngrihej artificialisht, si ato stimultantët e peshngritseve tona që na "nderuan" si shtet, si të ishim drogaxhi të pandreqëshëm.

Mu duk sikur po me binte tavani në kokë. Nuk isha ne Paris, as në Romë e Milano, as në Londër, as në Boston, New York apo Washington DC ku kam shkuar dhe kam parë edhe çmime të larta edhe çmime të ulta, sepse shpesh herë bëjnë ulje drastike, veçmas në USA. Isha në Tiranën e sallahaneve ku pranë shtëpive përdhese të shfaqen gjigandë që ngrihen drejt qiellit si të marrë e ku çmimi i lartë i shitjes së apartamenteve ja kalon edhe Parisit.

Dhe e dini sa bënte një Down Jackets e tillë në Web-Sitin e kompanisë Angelo Nardelli? Thjeshtë e saktë 242 Euro dhe mund ta bleje Via Internet.

Kam përshtypjen se dyqane të tilla të shumta tek ne, që na i quajnë dhe butikë dhe janë supër të shtrenjta (thuhet se edhe politikanët e deputetët kanë të tillë butikë), me çmime jashtë mundësive të blerësve shqiptarë, kanë diçka që është ex-comerciale. Diçka si money laundering machine.

Sepse mbahen edhe pa pasur asnjë shitje me ditë e javë të tëra.

E këmbë njeriu të hyjë brenda nuk sheh, veç këmbëve të bukura të shitesve.

26 mars 2018