DHURIM LIBRASH PËR BIBLIOTEKËN
“MUSINE KOKALARI” Nga K.P. Traboini
Shkrimtarët
shqiptarë janë në gjendje karantine
shtetërore, ata nuk mund ti dërgojnë librat nëpër librari sepse sipas urdhrave të
dikastereve qeveritare, kushdo që dërgon krijimet e veta në shitje duhet ti
shoqërojë me një NIPT( leje e numër biznesi kundrejt një pagese vjetore që kap shumën
mbi një milion lekë), gjë që për autorët që i botojnë librat me shpenzimet e
veta është e pamundur. Kësisoj lidhjet e autorëve shqiptarë me lexuesit janë
prerë arbitrarisht nga ata që paguhen nga paratë e popullit për të organizuar shpërndarjen
e librave si pjesë e qenësishme e kulturës kombëtare.
Ndodhur në këto rrethana, autorët shqiptar në vështirësi ekonomike i mbajnë librat
e botuar me shpenzimet e veta në shtëpi. Dëm i dyfishtë ky. Edhe financiar por
më kryesorja librat rrinë stok çfarë asnjë autor nuk e dëshiron.
Duke lënë
në një anë shpenzimet, se për pasionin e jetës do të paguash gjithsesi,
personalisht jam munduar të krijoj lidhje me lexuesit nëpërmjet dhurimit të
librave duke shfrytëzuar takimet dhe përurimet. Kështu në të gjitha përurimet e
librave të mi duke përfshirë edhe ato në Panairet vjetore të Librit, i kam
dhuruar. Në dy panaire thuajse gjysmat e librave i kam dhuruar “Itaka grua”
2008 dhe “Lule pellazgjike e “U dashka të dal natën vonë” 2012. Edhe në
takimin me studentët e Universitetin e Tetovës 2008 e njëjta gjë. Edhe në vitet
e mëvonshme me librat “E kam atdheun tek porta” 2013, “Dashuri” 2013, “Fajin e
ka Hekuba” 2014, po ashtu dhe në takimet në Prizren e në Tuz për librin “Flamuri
në Deçiq” 2012. Librin për fëmije “Djali nga Hoti” e kam shpërndarë të gjithë në
takimet me fëmijët në shkollën fillore të Traboinit të Hotit si dhe në shtëpinë
e fëmijës, Tiranë. Po kështu në Traboini të Hotit është organizuar promovimi
dhe është shpërndarë falas libri “Miti i Hotit”, 2017. Në bibliotekën “Marin
Bartleti” në Shkodër janë organizuar dy takime të mia me lexues ku janë shpërndarë
librat “Ode për Shkodrën”, “Aristidh Kola”, “Ofeli”, ”Orakujt kanë zbritur në
ferr” e tjerë. Duhet thënë se lidhjet me bibliotekën e vendlindjes janë të përhershme
dhe çdo libër të ri i botuar është dhuruar në dy kopje.Edhe pse në kushte të vështira izolimi nga
pandemia në këtë vit, botimin nuk e kam ndërprerë. Në 2016 organizuam një takim letrar e dhurim librash në Institutin e të Miturve në Kavajë. Këto ditë nëntori, në bibliotekën
“Musine Kokalari” që gjendet pranë bulevardit “Gjergj Fishta” në Tiranë,
dhurova 40 libra, 20 tituj nga dy kopje për secilin. Në këtë librari do të
dhuroj gjithashtu edhe botimet e reja të vitit 2019-2020 duke përfshirë “Zogjtë
e Arlingtonit”, “Charles Bukowski”, “World Poetica”, “American poetica”, si dhe
“Emily Brontë dhe 100 poetë nga bota”. Pavarësisht
në çfarë vështirësish kalon krijimi e çfarë sakrificash e shpenzimesh i përballojnë
autorët, mendoj se kontakti me lexuesin e justifikon gjithçka dhe është kënaqësia
më e madhe që merr një krijues. Kësisoj punonjëses së Bibliotekës “Musine
Kokalari” i afrova gjithashtu që kushdo krijues i ri, i pasionuar pas poezisë e
letërsisë, që dëshiron të ketë libra nga krijimtaria ime, mjafton ta shpreh këtë
dëshirë dhe do tua dërgoj librat dhuratë pa asnjë ngurrim. Kohët dhe rrethanat ndonjëherë
përmbysin çdo koncept. Në kushte të zakonshme lexuesit kërkojnë nëpër librari e
panaire librat e autorëve, por ndodhka që edhe autorët të kërkojnë lexues. Kjo është
një lidhje pa të cilin çdo krijim mbetet në harrim, prandaj ja vlen disa “sakrifica”,
sado të vogla.
10 nëntor 2020
 |
Takim letrar dhe dhurim librash në Institutin e të Miturve në Kavajë 2016
|
