 |
| Në foto: Hilmi Tukaj, Niç Bedeni dhe Nard Bushati |
“SHTIGJET E ÇELUNA” TË RINISË SONË NË
SHKODËR
Ferdinand Bushati paska këtë vit 86
vjetorin e lindjes dhe gëzon shëndet të plotë. Bashkohem dhe unë me urimin e
shumë prej atyre që ruajnë admirim e respekt
për figurën e tij, për shpirtin artistik e njerëzor. Jetë të gjatë profesor
Nardi! Çfarë mund të them tjetër në këtë ditë të bukur për ty? Plot mund të
them për ty Nard Bushati. Për ty dhe për ne. Se puna jote ishte komunikimi njerëzor,
ajo për të cilën kishte aq shumë nevojë shoqëria shqiptare dje, por edhe sot ka
nevojë. Pikërisht atë frymë e mirësjellje që pas kthimit nga shërbimi ushtarak,
sapo kisha gjetur në fabrikën e Fibrës në Shkodër tek inxhinier Bujar Bedalli,
që mirësish më pranoi në punë, kur kisha mbetur pa strehë e pa mbështetje, aq sa
nuk mund të përshkruhet pa një dhimbje të madhe ajo çfarë koha i rezervonte
njeriut. Gjë e rrallë për kohën kjo mirësi njerëzore. Edhe tek Nard Bushati takova gjithashtu njeriun
e mirësjellë, një masovik të mrekullueshëm. Gjithmonë i qeshur, që i mirëpriste
të rinjtë e qytetit e jo vetëm ata, në Klubin e Rinisë me një mirësi tipike
shkodrane. Me Nard Bushatin e ndjeje vetën mirë. Ishte miqësor e i afërt me të gjithë.
Tip sportiv, artist, që dinte si të sillej e të afronte njerëzit. Klubi i Rinisë
që nga viti 1968 kur erdhi Nard Bushati e me tej, u bë një qendër rinore e pa zëvendësueshme
e qytetit.
Mbaj mend se kishte në Shkodër edhe një degë hijerëndë
të Lidhjes së Shkrimtarëve, por ishte krejt e paralizuar dhe e politizuar. Nuk i nuk i afronin të rinjtë,
aq sa një herë, një shkrimtar që shumëkush mund ta ketë harruar, korçari Guri
Miçinoti, u tha në mes të mbledhjes i nervozuar se drejtuesit po mburreshin sikur i ndihmonin talentet e reja: “Të
rinjtë jo vetëm që nuk i afroni e ndihmoni, por ata, kur shkojnë ti takojmë
pshurrën prej frikës së shefave”. Një guxim i çmendur nga një shkrimtar shofer në
atë kohë, por që e mbronte qenia si punëtor dhe “Hë mo, se kështu është Guri.”
Por me Klubin e Nard Bushatit ndodhte
ndryshe. Isha punëtor me një jetë të izoluar, e ku tjetër mund te takoja miq
letrare veç tek Klubi i Nard Bushatit. Atje u njoha së pari vetë Nardin që më
mirëpriti e më prezantoi me profesorin e ndjerë Hasan Lekaj, që drejtonte
rrethin letrar. U takova e u miqësova pastaj me Tonin Shtjefnin, Alfred
Çapalikun, Dod Kaçaj, Bashkim Golemin, Xhahid Bushatin, Mehmet Gucinë, Rudina
Lohja e Suzana Gegenin, Shyqyri Mollaj, Arben Shehi, Ruzhdi Jata, Fluturak
Germenji, Fejzi Gushta, Vjollca Kapisyzi ,Robert Jaubelli, Marta Qesteri, Muço
Muho, Pëllumb Sulo, Burhan Kurti, Ruzhdi Jata, Kudrete Kozmaj, Qemal Hoxha,
Mehmet Shpuza, Bedri Islami, Maliq Bitri, Valentina Ago, Drita Bekteshi, Jozefina
Nikaj, Paulin Shtjefni, Osman Kazmaj, Ilir Resnja, Luan Mema, Qemal Hoxha,
Gëzim Basha, Abdulla Poti, Hilmi Tukaj e tjerë. Përmenda 36 letrarë të rinj të
grupit që nën kujdesin e Nard Bushatit dhe prof. Hasan Lekes nxirrnim almanakun
letrar “Shtigje të çeluna” një kopje të cilit, botim i vitit 1970, e ruaj si një
libër i çmuar në bibliotekën time personale. Edhe me shkakun emocional se aty
kam botuar tregimin tim të parë, “Muzg i bardhë”, me motiv vrasjen në Pejë të motrës
së “Motrës Tone” të Kol Idromenos, një ngjarje e dhimbshme brenda familjes sime.
Ku mund ti njihja gjithë këto krijues
të rinj pa atë takimin dhe afrimin që më bëri Nard Bushati në klubin e Rinisë,
ku u gjenda me kaq shumë miq e shokë që nuk i kisha pasur kurrë më parë. Mos
vallë do të mund të ecja sadopak në fushë të letrave e të gazetarisë pa atë përvojën
sado të vogël në Klubin e Nard Bushatit. Mendoj se jo. Se në jetë njeriu e
krijon përvojën e vet copëza - copëza për të krijuar e gjetur vendin e vet sado
modest në mozaikun e madh të artit.
Të flasësh për Nard Bushatin është sikur të
flasësh për pasionet e qindra të rinjve, për të gjithë këta miq e shok të ëndërrimeve
letrare të rinisë sonë, bash atëherë kur nisën udhët tona nëpër “Shtigjet e çeluna”
të Klubit të Rinisë në Shkodër.
Shtator 2018
Foto e sipërme e marrë nga Agron Isufi
Foto e poshtme almanaku "Shtigje të çeluna" 1970 dhe tregimi "Muzg i bardhë" nga K.Traboini
Foto e poshtme almanaku "Shtigje të çeluna" 1970 dhe tregimi "Muzg i bardhë" nga K.Traboini
 |
| WORLD POETICA CHANNEL |
